Um nokkurt skeið hefur verið unnið að nýrri skipulagsreglugerð sem mun leysa reglugerð nr. 400 frá 1998 af hólmi. Skipulagsstofnun hefur nú skilað drögum að nýrri skipulagsreglugerð til Umhverfisráðuneytisins. Mikið var lagt upp úr samráði við gerð nýrrar reglugerðar og var yfir 70 aðilum, auk sveitarstjórna, tilkynnt að hafin væri vinna við endurskoðun skipulagsreglugerðar og kallað eftir ábendingum frá þeim. Í lokadrögum þeim sem nú liggja fyrir er að finna töluverða nýbreytni frá eldri reglugerð. Eldri reglugerð var kaflaskipt eftir viðfangsefnum og málsmeðferð og voru ákvæði um skipulagsstigin þar undir. Drögum að nýrri reglugerð er hins vegar skipt í kafla eftir skipulagsstigum sem innihalda ákvæði um málsmeðferð og viðfangsefni hvers skipulagsstigs. Tilgangurinn með þessum breytingum er að veita betri yfirsýn í ferli hvers skipulagsstigs frá upphafi skipulagsgerðar til gildistöku skipulagsáætlunar. Eins og við var að búast er mikið lagt upp úr samraði við hagsmunaaðila og almenning, og aukin áhersla er lögð á umhverfismat á öllum skipulagsstigum.